Heimat- und Fördergemeinschaft
Börde Heeslingen e.V.
|
|
SIN heet : Sprookenvariatschoon in Norddüütschland.
Dat is een Forschensprojekt vun de Sprookweetenschop. Se wüllt rutfinnen, wat sik in den tweesprookigen düütschen Norden mit Hoch un Platt doon het un doon deit. Se meent, Platt geiht trüch un dat Hochdüütsche in’n Norden is blangen Platt anners wussen as dat in’n Süden vun de Bundsrepublik. Dat wüllt se in dat SIN-Projekt diagnostizeern un utklooken, wo sik dat vundoog in Hoch anhüürn deit.
Längs de 18 plattdüütschen Dialektregionen in Norddüütschland schall dat ünnersöcht wardn. 6 Universitäten deelt sik de Arbeid : Hamborg, Münster, Kiel, Frankfurt/Oder, Potsdam un Bielefeld (wi weet nich, wo de Örters up Platt heeten doot). Jedeen Unität mookt sik över dree Regionen her. 36 Dörpers un Städer hebbt se utwählt, in de se jümmers veer Fruuns interviuun un mit ehr Familjen Sprookupnohmen mooken wüllt; jümmers twee, de reinweg in’t Hochdüütsche leven, un twee, de in ehr Familjen miehr Platt schnacken doot. De Unitäten wüllt, wenn se denn de Interviuus un de Sprookupnohmen utwert’ hebbt, een grooten Bericht geven. De för ganz Düütschland tostännige Düütsche Forschensgemeenschop betohlt dat allns. So is dat SIN – Projekt een DFG – Projekt. Dat is doch wat.
In de Heimat- und Fördergemeinschaft Börde Heeslingen hebbt wi dacht, dat in so’n Projekt ook rutsuern deit, wat vun Hoch no Platt rinmengeleert is, ümgekiehrt as dat, wat fröher von Platt no Hoch loopen dee. In’n Junimoond 2008 hebbt wi Fru Perfessor Ingrid Schröder an de Uni Hamborg, de in dat Projekt dat Leit het, een Teeken geven, wi weern in Heeßel interesseert an dat, wat se rutfinnen doot. Wi hebbt up de nu schreeven Interviuus vun Willi Dettmering ut de 80er Johrn henwiest, in de tachentig Manns- un Froonslüüd ut de Börd Heeßel över ehr Belevnisse in de Tiet vun 1900 bit 1980 up Platt Bericht geeven hebbt, un ook up uns lütt Böker vun 1998 un 2008 mit oole Wüür, so se in Heeßel un ümto schnackt ward.
Fru Schröder het dat in de Projektarbeid mit upnohmen un bi uns anfrogt, of ut de Börd Heeßel veer Gewährsfruuns för dat Projekt uttomooken sünd. Wi kunnen dree Fruuns för Hoch un dree för Platt benöömen, de inverstohn weern. Bit in’t Fröhjohr 2009 sünd veer Fruuns mit ehr Familjen interviuut wordn. Nu is Fru Dr. Birgit Kellner, de ut dat Projekt hier ween is, ierst mol in Oostfreesland togangen. De Uni Hamborg mutt sik blangen de nordhannoversche Region, to de Heeßel tohüürn deit, ook um de oostfreeske un de emsländisch/ollenborgsche Region kümmern.
Heeßel hüürt so to de Projektdörpers vun’t SIN – Projekt. Dat wüllt wi uns Lüüd to weeten geeven. Villicht helpt se dat, Berichte över dat SIN - Projekt in de hochdüütsch schreeven Bläder nich to översehn un interesseerter uptonehmn. In’n Märzmoond 2009 het Fru Schröder ganz suutje to „Die Welt“ seggt, dat de Minschen över dat Plattdüütsche vundoog anners dinken doot as in de verleden Johrteihnten. De Lüüd seht de Sprook nich miehr as rückstännig or as Sprook bloots vun de eenfachen Lüüd an. Salonfähig ward de Sprook ook al bi de Minschen, de Plattdüütsch överhaupt nich or nich miehr up de Tung hebbt.
Wat ut dat Projekt woll rutsuert ?
Loot Jo dat good gohn.
Offens, d. 8.7.09
Karl-Walter Bluhm
zurück zur Startseite