Bördenheimathaus Wappen von Heeslingen

Heimat- und Fördergemeinschaft

Börde Heeslingen e.V.
zurück zur Startseite

Platt to hegen un to pleegen, dat is schulig,
man: vundoog för Platt to strieden, dat is nödig!

In us Bördegemeenschopp, meernmank in't Flach twüschen Elv un Werser, hebbt wi dat Platt heegt un pleegt. Wi hebbt Schrieverslüüd in us Bördeheimathus hatt, de vordrägen or vörlesen deen; dat weer scheun un kunn meist wat miehr ween. 1986 hebbt sik de Börd Heeßler Plattdüütschsingers gründ't. 1989 keemen de Börd Heeßler Theoterspeelers dorto. Un wenn dat sonst noch wat in't Bördeheimathus geeven deit, dennso geiht dat meist up Platt.
1998 wulln wi ook wat över de plattdüütsche Sprook sülvst to weeten kriegen, ehr herkoomen, ehr Geschicht. Wi hebbt us de Wannerutstellung vun't Institut för de neerdüütsche Sprook "Plattdüütsch - een Sprook stellt sik vör" utlehnt. 800 Besökers in 14 Doogen hebbt se sik ankeken.

Plattdüütsch is blangen Hochdüütsch in'n Noorden vun Düütschland nich blots de "verdeckte" Tweetsprook, so seggt dat de Sprookwetenschopp, se is ook de Regionolsprook, de in de Öffentlichkeit schnackt un schreven wardn kann, just so as Hochdüütsch, so steiht dat in de Europäsche Sprookencharta vun 1992.
Un dat hett us denn dorto bröcht, de plattdüütsche Sprook in de jungen Familjen, de Kinnergoorns und de School to bringen.

Platt in de jungen Familjen

Wi hebbt keen Gelegenheit utloten, de jungen Öllern up den Vördeel vun de fröhe Tweesprookigkeit mit Hoch un Platt för de Kinner hentowiesen. De Grundschool in us Dörp, de Kinnergoorns un Speelkoppels ümto un ook de Volkshochschool in Zeben hebbt us dorbi hulpen. Toletzt hebbt wi een Empfehlung rutgeeven, de wi to hunnerten und Duusenden ünner de Lüüd' bröcht hebbt. Un wi hebbt een lütt Wüürbook to dat Heeßler Platt rutgeeven.

Platt in de Kinnergoorns un Speelkoppels

Vun de Utstellung un de Veranstalten in Heeßl vun'n Septembermond in 1998 het sik een Arbeidskoppel vun Erzieherinnen "Zweisprachigkeit mit Hoch un Platt" rutbüld't, to de nu 16 Kinnergoorns un Speelkoppels ut den Landkreis Rodenborg in ook den Landkreis Stood tohüürn doot.

Plattdüütsch in de School

De Grundschool in Heeßl hüürt to de Schoolen, de keen Schoolmesters miehr hebbt, de vun Huus ut Platt mitbringen doot. In'n Harfst 1998 het de Grundschool overs een friwillig Arbeidsgemeenschopp inrichten kunnt. De gifft dat vundoog noch. An düsse School keem ok een Arbeitsgemeenschopp för plattdüütsch Laienspill in Gang. Us Vereen ünnerstützt ok vundoog noch disse Projekte mit Hülpslüüd un Geld.
Dor is al 'n masse doon worn, ober dat gifft ok noch veel Arbeit.


De meerste Arbeit för disse Arbeidsgruppe Plattdüütsch het Karl-Walter Bluhm mookt, de för eene Öbergangstied to dit Thema noch anschnackt warn kann.

Sien Adress is:     Karl-Walter Bluhm
              27404 Heeslingen-Offensen
zu den aktiven Gruppen
zurück zur Startseite








Ole Lüüd ut de Börd Heeßel vertellt


Dat is nu all 'n ganze Tied her, so inne Johrn 1984 bit 1986, dor hett Willi Dettmering een ganzen Barg von ole Lüüd ut all de Dörper von de Börd Heeßel, un ook ut Brauel, utfrocht, wat dat denn so fröher wür inn use Dörper.

Anfungen hett alln's so üm 1983 rüm. Domols hett Willi Dettmering, toirs inne schoul, un denn ok inn Heimathus, in'n Utstellung wiest, wat dat fröher all för Sooken geev, dee een so in Alldag bruckt hett. Dor sünd 'n Barg Minschen komm un hebbt sick dat ankeken un doröber schnackt un meent, dat dat allns ok eegentlich vör lotere Johren fasthoulen warden müss.
Willi DettmeringWilli Dettmering

Un denn sünd jümmer so an de 5 - 6 Personen tohopkomen, Manslüd und Froonslüd, hebt inn komodige Run'n Koffie drunken und öber ole Tieden klönt. Iersmol würn se 'n beten bang för dat Mikrofon, obers denn bald set sick dat. Schnackt worn is denn ok bald trüch bit no 1900. Dorbi is jüm so veel infulln, dat dat mennigmol veele Stünnen durt het.

Dropen hebt se sik mol hier, mol dor, inne Döns, ober ok, so as in Wiersdörp, in Kroog. Un doran kann een seen, wat dat wichtig is, disse ollen Saken optonehmen, denn dissen Kroog gift dat vundaag all nich mehr.

Bi disse Klönerei sind woll so an de 40 Kassetten opnohmen worn. Anne un Heinz Szenteleit hebt sik doran sett, all disse opnohmten Wüür op neemodsche Schieben to kopieren. Dorbi sind nu all 12 DVD's vull worn, un dat is man irst de halbe Arbeit.

Anne SzenteleitAnne Szenteleit Heinz SzenteleitHeinz Szenteleit

Anne Szenteleit is nu all so 1 Johr dorbi, dat wat secht worn is, in Baukstoben umtoschriewen. Un dat so in't Plattdüütsche, wie de Kassetten ok vullschnackt worn sünd. Ober mußt weten, dat is gornich so licht. Opnohmen sünd de Kassetten mit een ganz eenfachen Rekorder öber dat ingebaute Mikrofon so dat dat mennigmohl nich eenfach to vestohn wen is. In dit Johr hett Anne nu all so Stücker 230 Pepierblör vullschreben, und dat is man iers de halbe Deil. Ganz fertig wen schall dat , wenn't geiht, to End vun dit Johr.

Dat Plattdüütsche ward so in Wüür ümsett, wie dat ok schnackt worn is. Un dat is ok all inne Börd Heeßel von Dörp to Dörp wat anners bi inkelte Wüür.

Dacht hebt wi us dat so, dat all dit denn mol at litjet Heft, villich no inkelte Themen, so no un no to köpen wen schall. Wie de Arbeit so widergohn schall, doröber wüllt we hier an disse Stehr so af un an vertelln.


zu den aktiven Gruppen
zurück zur Startseite